|
|
- 頂樓的馬戲團 海風 歌詞
- 頂樓的馬戲團
- 上海個風
吹到西又吹到東
要吹到河裡
從來就嘸沒人能搞得懂
伊勒長江口一吹就吹了幾百年
拿一幫小鬼頭吹成了老朋友
上海個風
吹出來陸家嘴個摩天高樓
一幢高過一幢勿造到天堂是誓勿罷休
伊拿石庫門一扇扇吹成功了新天地
再拿新天地吹到了全國步行街個高頭
上海個風
吹脫了一個叫盧灣個區
要是好吹估計要拿高頭個梧桐樹也儕要吹得去
伊拿靜安寺吹得像世博會個泰國館
再拿弄堂個小人一批批吹到了城鄉結合部個郊區
上海個風
吹來了外地人到上海打拼
勿知勿覺吹出來2300萬上海人
再拿上海人吹到了澳洲美國加拿大
七大洲五大洋到處儕有阿拉朋友親眷
親愛個上海今朝儂吹個是啥個風
為啥體總有點佝嘰嘰勒我胸口
親愛個上海聽說世界將要天下大同
但請儂告訴我究竟想要我哪恁做
上海個風
吹出來十幾根地鐵線
內環中環外環接牢仔一圈是又一圈
伊拿汽車牌照吹成功一部新車子個價鈿
但往往開車子最繞個路線就是最快個路線
上海個風
拿滑稽戲吹進了電視機
讓滑稽戲搿門藝術變得是越來越滑稽
從屏幕裡就好像看到一幫猢猻勒海出把戲
伊拉恨勿得衝出來硬勁呵儂個癢習習
上海個風
拿上海閒話從上海灘吹個乾淨
吹出一代代只會講國語英文個上海小人
要聽正宗上海閒話只好去看“新老娘舅”柏萬青
柏阿姨就是萬千上海人心目中個包青天
上海個風
吹季風吹脫了季風書園
拿國際奢侈品牌打包吹進了南京路西
現在整個上海大概只有幾粒老城隍廟個五香豆
為“上海製造”維持點罪過八臘個虛榮心
親愛個上海
今朝儂吹個是啥個風
為啥體總有點佝嘰嘰了我胸口
親愛個上海
聽說世界將要天下大同
但請儂告訴我
究竟想要我哪恁做
親愛個上海
明朝儂又要吹啥個風
為啥體總有眼嚇咾咾了我心中
親愛個上海
聽說世界已經天下大同
但請儂原諒我
還是拎勿清該哪恁做
上海個風
吹到東又吹到西
要吹到河裡
老早就嘸沒人再會去關心
伊拿上海人吹得是越來越嘸沒脾氣
想尋開心只好去頂樓馬戲團看馬戲
想尋開心只有去頂樓馬戲團看馬戲
|
|
|
|
